Shkëlzen Gashi është lojtari më në formë i kombëtares shqiptare në këtë vit kalendarik, por edhe më tej. Me golat dhe paraqitjet e tij në klubin ku luan, Bazeli, ai ka bërë për vete jo vetëm tifozët e kampionëve helvetë, por edhe klube të huaja. Dhe nuk bëhet fjalë për klube dosido, por së fundi flitet për një interesim të gjigantëve të Bundesligës, Shalke 04.
Sipas medias zvicerane, konkretisht “fussballinfos.ch”, skuadra e njohur gjermane ka bërë një ofertë prej 8 milionë eurosh për sulmuesin e kombëtares shqiptare, Shkëlzen Gashin. Megjithë rekrutimin e Franco Di Santos, Shalke do ta përforcojë më shumë repartin ofensiv. Klubi gjerman nuk po dorëzohet, përkundrazi, i ka shtuar përpjekjet për ta bërë të vetin Shkëlzen Gashin (26 vjeç).
8 milionë euro janë vendosur në tavolinë të bisedimeve me Bazelin për të marrë shërbimet e sulmuesit, ndërkohë që po reziston klubi kampion i Zvicrës, që deri më tani nuk ka dhënë shenja se do të privohet nga ylli i tij. Sikurse dihet, Shkëlzen Gashi ka kontratë me kampionët zviceranë deri në vitin 2018. Ai iu bashkua një vit më parë Bazelit, me të cilin doli shënuesi më i mirë dhe fitoi titullin kampion në shtetin helvet. Edhe kampionatin e ri zviceran, që ka luajtur dy javët e para, e ka nisur me gol sulmuesi shqiptar.
Konkretisht, dje, në ndeshjen ndaj Grasshopersit, në fushën e këtij të fundit, Gashi realizoi golin e zhbllokimit të rezultatit nga një goditje dënimi, ndërsa Bazeli fitoi 3-2. Kampionatin e kaluar, Shkëlzen Gashi e mbylli si golashënuesi më i mirë në Zvicër, ndërkohë që shënoi plot 22 gola. Një edicion më parë, si pjesë e Grasshopersit, lojtari i kombëtares shqiptare do të regjistronte 19 gola të shënuar. Pra, nga viti në vit, Shkëlzen Gashi është kthyer në një “makineri golash”, edhe pse nuk luan si sulmues i mirëfilltë. /telesport.al/
No Comment to " Shalke kërkon Gashin, gati 8 milion € për Bazelin "